बामदेवलाई यसकारण बनाउनुपर्छ प्रधानमन्त्री

  पत्रपत्रिका खबर  164 पटक हेरिएको

गोबिन्द थापा– नेकपाका उपाध्यक्ष बामदेव गौतमलाई भावी प्रधानमन्त्री बनाउने भनी नेकपाका अध्यक्ष केपी शर्मा ओलीले प्रस्ताव सुनेर धेरै मानिस खुसी भएका छन् । यो प्रस्ताव सुनेर खुसी हुनेमा आम जनता र खासगरी नेकपाका कार्यकर्ता देखिएका छन् । कतिपयलाई यो प्रस्ताव अस्वाभाविक लागेको छ । कतिपय नेता चाहिँ ‘अध्यक्ष ओलीले नै प्रस्ताव गरेपछि अब बामदेव प्रधानमन्त्री बन्ने भए’ भनी छाती पिट्दै रोइकराई गरिरहेका छन् । त्यस्ता नेताहरु यो प्रस्तावलाई कसरी विफल पार्न सकिन्छ भनेर उछलकूद गरिरहेका छन् ।

लेखक गोबिन्द थापा

यति महत्वपूर्ण प्रस्तावमा विभिन्न खालका क्रियाप्रतिक्रिया आउनु स्वाभाविक हो । किनभने बामदेवलाई भावी प्रधानमन्त्री बनाउने भनी अध्यक्ष ओलीले राखेको प्रस्तावसँग देश र जनताको सुनौलो भविष्य गाँसिएको छ । बामदेव गौतम प्रधानमन्त्री बन्नु सम्भव कि असम्भव ? यो बहसको विषय छ । यो बहसमा पहिलो वाक्यमै लेखिहालौं– केपी ओली, झलनाथ खनाल, माधवकुमार नेपाल प्रधानमन्त्री बन्न हुने, उनैका सहयोद्धा तथा सहपुस्ताका बामदेवले चाहिँ किन नहुने ? खासगरी नेकपाको पार्टी पंक्तिले बुझ्नुपर्ने र मनन गर्नुपर्ने कुरा हो यो । प्रधानमन्त्री भइसकेका नेताहरुभन्दा बामदेव कुनै दृष्टिले अयोग्य छैनन्, बरु योग्य छन् ।

कतिपय नेताहरु संविधान अनुसार बामदेव गौतम प्रधानमन्त्री बन्न सम्भव छैन भनिरहेका छन् । राजनीति एउटा वृहत् प्रक्रिया हो । राजनीति भनेको कूवाको पानी जस्तो स्थिर हुँदैन । राजनीति चलायमान हुन्छ । वृहत् राजनीतिक प्रक्रिया भित्रकै एक अंग हो संविधान र कानुन । संविधानले राजनीति जन्माएको होइन, राजनीतिले संविधान जन्माएको हो । तसर्थ, संविधान संशोधन गरेर मार्ग प्रशस्त गर्न सकिन्छ । बामदेव गौतमलाई राष्ट्रिय सभाबाट प्रधानमन्त्री बनाए पनि हुन्छ, प्रतिनिधि सभाको सदस्य निर्वाचित गरेर बनाए पनि हुन्छ । नेकपाका एकसे एक सांसद्हरु बामदेवलाई आफ्नो क्षेत्रमा लगेर निर्वाचित गर्न लालायित छन् । आफ्नो क्षेत्रमा चुनाव लड्ने नेता प्रधानमन्त्री बनाउन पाइयोस् भनेर जनता पनि बामदेवको स्वागत गर्न आतुर छन् ।

राष्ट्रिय सभाबाट प्रधानमन्त्री निर्वाचित गर्ने व्यवस्था गर्न हुँदैन भनेर नेकपाका कतिपय नेताले भनिरहेको सुनिन्छ । के बुझौं भने माथिल्लो सदनका सदस्य प्रधानमन्त्री चयन हुने व्यवस्था विश्वका धेरै देशमा छ । छिमेकी भारतमा पनि यही व्यवस्था छ । नरेन्द्र मोदीभन्दा पहिलेका प्रधानमन्त्री मनमोहन सिंह त्यहाँको राष्ट्रिय सभाका सदस्य थिए । राष्ट्रिय सभा सदस्यकै हैसियतमा प्रधानमन्त्री बनेका थिए । राष्ट्रिय सभाबाट प्रधानमन्त्री चुनिने व्यवस्था विश्वका लागि सामान्य हो । यस्तो व्यवस्था गर्दा केही नेताको व्यक्तिगत स्वार्थमा आकाश खस्न पनि सक्ला तर संवैधानिक प्रक्रिया भत्कँदैन, बिग्रँदैन ।

बामदेव गौतम चुनाव हारेको नेता कसरी प्रधानमन्त्री बन्न पाइन्छ ? यसो गर्दा जनमतको अवज्ञा हुन्छ भन्ने नेताहरु नेकपाभित्रै उत्पति हुनु अनौठो हो । आज नेकपाको जे हैसियत छ, नेताहरुको जे हैसियत छ त्यसमा बामदेवको ठूलो योगदान छ भन्ने उनीहरुले बिर्सिएका छन् । हो, बामदेवले गत आमचुनावमा प्राविधिक रुपमा हारेका हुन् । तर, चुनावमा जित्नेले सदाका लागि जित्दैन, हार्नेले सदाका लागि हार्दैन । बामदेवलाई पुन चुनावी प्रक्रियामा लैजान सकिन्छ र लानु पनि पर्छ । जनताको चाहना र देशको आवश्यकता निरन्तर बदलिन्छ । देशलाई केपी ओलीको उत्तराधिकारीका रुपमा बामदेव गौतम चाहिएको छ भन्ने स्पष्ट भइसकेको छ ।

०१४ सालको आमचुनावमा कांग्रेसका नेता कृष्णप्रसाद भट्टराई चुनावमा पराजित भए । तर, उनलाई प्रतिनिधि सभा अर्थात् तल्लो सदनमा लगेर मनोनीत गरी सभामुख समेत बनाइयो । उनै कृष्णप्रसाद भट्टराई ०४८ को आमचुनावमा पराजित भएपछि निर्वाचित भएर प्रधानमन्त्री बने । तत्कालीन माओवादीका अध्यक्ष पुष्पकमल दाहाल एक क्षेत्रबाट चुनाव हारे, अर्काे क्षेत्रबाट जिते । एकठाउँबाट हार्नु पनि हार्नु नै हो भन्न सकिएला नि, होइन र ? तैपनि प्रधानमन्त्री बने ।

तत्कालीन एमालेका नेता माधवकुमार नेपाल आमचुनावमा पराजित भए तर तत्कालै संविधान सभामा मनोनीत भएर प्रधानमन्त्री बने । भारतको संविधानसभाका अध्यक्ष भिमराव अम्बेडकर निर्वाचित भएकै थिएनन्, उनलाई जवहारलाल नेहरुले मनोनीत गराएर अध्यक्ष बनाएका थिए । राजनीतिमा समयको माग र देशको आवश्यकता बुझेर विभिन्न कदम चाल्नुपर्छ । बामदेवलाई भावी प्रधानमन्त्रीका रुपमा स्थापित गर्नु देशको अहिलेको आवश्यकता हो, जनताको माग हो ।

यसमा अनौठो कुरा के छ भने बामदेवको नाममा आम जनताको आपत्ति छैन, अन्य दलका नेताहरुको पनि आपत्ति छैन तर नेकपाकै खास प्रवृत्तिका नेताहरुको चाहिँ विरोध देखिन्छ । आमचुनावमा हारेका मानिस पनि मन्त्री बन्न सक्ने प्रावधान अनुसार संविधानसभा कालखण्डमा धेरै मानिस मन्त्री बनेका थिए । तसर्थ, राजनीतिमा चुनाव हार्नु र जित्नु स्थायी चिज होइन । आज जितेको मानिसले भोलि चुनाव हार्छ, आज हारेको मानिसले भोलि चुनाव जित्न सक्छ । कोही व्यक्तिले चुनाव हार्नु र जित्नुले उसको समग्र राजनीतिक भविष्य निर्धारण गर्न सक्दैन । त्यसैले बामदेवले चुनाव हार्नु कुनै ठूलो कुरा होइन । चुनाव हारेकै कारण बामदेव अयोग्य हुन् भन्न मिल्दैन ।

जसरी अहिले प्रधानमन्त्री केपी ओली तथा उनको नेतृत्वको सरकारले उत्कृष्ट काम गरे पनि दुराग्रहपूर्ण प्रचार गरिँदैछ । त्यसैगरी बामदेव विरुद्ध पनि दुष्प्रचार गरिँदैछ । बामदेव इमानदार नेता भए पनि उनी विरुद्ध धेरै पटक धेरै खालको दुष्प्रचार भएको छ । निष्ठा र इमानका दृष्टिले बामदेव नेकपाका अब्बल तर अभागी नेता हुन् । बामदेवले सबैलाई बनाए, सबैलाई योगदान गरे तर आफूलाई बनाएन् । त्यसैले अहिले बामदेवलाई भावी प्रधानमन्त्री बनाउन केपी ओली अगाडि सर्दा विरोध गर्नु मनासिब हुँदैन ।

तत्कालीन एमालेको कुरा गर्ने हो भने त्यसबेला नेकपाका कार्यकर्ताको आशा र भरोसाको केन्द्र बनेका मुख्य दुई नेता थिए– केपी ओली र बामदेव गौतम । यी दुई नेता एक ठाउँ हुँदा, एक ठाउँ उभिँदा त्यसबेला देशको अवस्था फेरिएको थियो, तत्कालीन नेकपा एमालेको हैसियत चुलिएको थियो । अब नेकपामा यी दुई नेता एक ठाउँ आउने बातावरण बनेको छ, अहिलेको आवश्यकता यही हो । वर्तमान राजनीतिक खिचातानी आम जनता र कार्यकर्ताका लागि दुखद छ । यो खिचातानीका बीच पनि दुई नेता केपी ओली र बामदेव गौतम मिलेर मुलुक र पार्टीलाई अझ उत्साहसाथ अगाडि बढाउने बातावरण निर्माण हुँदैछ । यो सुखद पक्ष हो ।

कतिपयले बामदेवलाई प्रधानमन्त्री बनाउने केपी ओलीको प्रस्तावलाई अविश्वसनीय भनेका छन् । नपत्याउनु भन्दै हल्लाखल्ला गरिरहेका छन् । कालो कोठाभित्र गोप्य मिटिङ गरिरहेका छन् । एकातिर अविश्वसनीय प्रस्ताव भन्ने अर्कातिर त्यो प्रस्ताव असफल पार्न षडयन्त्र गरिरहेका छन् । सत्य के हो भने बामदेवलाई प्रधानमन्त्री बनाउने प्रस्ताव केपी ओलीले कानमा खुसुक्क राखेका होइनन् । कालो कोठाभित्र भनेका होइनन् । केपीले बामदेवलाई अगाडि सारेर कालोकोठे राजनीति गरेका होइनन् ।

बकाइदा सचिवालयको औपचारिक बैठकमा अध्यक्षको हैसियतले प्रस्ताव राखेका हुन् । कसैको कानमा नभएर, कसैको गुटको बेलामा नभएर सचिवालयमा सबैका सामु प्रस्ताव राखेका हुन् । सचिवालय बैठकपछि पनि विभिन्न नेता तथा सांसद् एवं जिम्मेवार कार्यकर्ता बीचमा आफूले बामदेवलाई प्रधानमन्त्री बनाएरै छाड्ने घोषणा गरेका छन् । खुलेआम गरिएको घोषणालाई छलछाम भन्ने अनि प्रतिपक्षी तथा रहस्यमय पात्रहरुसँग कालो कोठामा राखिएका प्रस्तावहरुलाई चाहिँ विश्वसनीय र आधिकारिक ठान्ने ? यो हुन सक्दैन ।

यसमा बुझ्नुपर्ने कुरा के हो भने केपी शर्मा ओलीबाट बामदेवलाई नै प्रधानमन्त्री बनाउने प्रस्ताव किन आयो ? किनभने केपी ओली र बामदेव विगतमा फरक समूहमा रहँदा पनि आपसमा मिल्ने नेता हुन् । मुलुक र पार्टी संकटमा पर्दा आपसी सहकार्य गरेका नेता हुन् । संकटमा एकले अर्कालाई साथ दिएका छन् । दुवै नेता प्रष्टबादी र हक्की छन् । दुवै एक्शन ओरियन्टेड नेता हुन् । यति कारणले मात्र अध्यक्ष ओलीले बामदेवलाई प्रस्ताव गरेका चाहिँ होइनन् । केपी अध्यक्ष हुन्, बामदेव उपाध्यक्ष हुन् । अध्यक्षले उपाध्यक्षलाई अगाडि सार्नु स्वाभाविक प्रक्रिया हो । अर्काे कुरा, नेकपाको शीर्ष तहमा जेजति नेता छन् उनीहरु विगतमा प्रधानमन्त्री भइसकेका छन्, बामदेव मात्र हुन बाँकी छ । यसकारण पनि अध्यक्ष ओलीले उपाध्यक्ष बामदेवलाई भावी प्रधानमन्त्रीका रुपमा स्पष्टसँग अगाडि बढाउन चाहेको प्रष्टै देखिन्छ ।

केपी र बामदेवको काम गराईको स्प्रीट मिल्छ, विचार मिल्छ, विकासप्रतिको दृष्टिकोण मिल्छ । दृढ स्वभाव र संकल्प पूरा गर्ने स्वभाव मिल्छ । सपना देख्ने र त्यो सपनालाई व्यवहारमा उतार्ने जुझारुपना मिल्छ । नेपालको राष्ट्रिय स्वाभिमान उच्च राख्नुपर्छ भन्ने चिन्तन मिल्छ । नेपाल गर्व गर्न लायक देश हो भन्ने दृष्टिकोण मिल्छ । यसकारण केपी ओलीले बामदेवभित्र आफ्नो प्रतिरुप देख्नु अस्वाभाविक होइन । त्यसैले केपीले बामदेवलाई नै प्रस्ताव गरेका हुन् भन्ने नेकपाभित्रका इमानदार कार्यकर्ता सबैले बुझेका छन् ।

मुख्य कुरा, व्यक्ति केपीले अर्का व्यक्ति वामदेवलाई प्रस्ताव गरेका होइनन्, अध्यक्ष ओलीले उपाध्यक्ष बामदेवलाई प्रस्ताव गरेका हुन् । यो स्वाभाविक छ र जायज पनि छ । यो प्रस्ताव कार्यान्वयन गर्नु नेकपाका नेताहरुको कर्तव्य हुन आएको छ । नेकपामा नेताहरुको ठूलो पंक्ति छ । सबै नेताका आआफ्नै प्रकारका गुण र विशेषता छन् । अहिलेको सन्दर्भमा केपी ओली र बामदेवको टिमले सरकार हाँक्नुपर्छ भन्ने आम बुझाई हो । यसमा बिर्सन नमिल्ने तथ्य के हो भने अहिले प्रचार भए जसरी सरकार ढल्ने अवस्था छैन ।

नेकपाका सचिवालयका सम्पूर्ण सदस्यहरुले एकमत भएर गत मंसिरमा प्रधानमन्त्री ओली नेतृत्वको सरकार पाँच वर्ष चलाउने निर्णय गरेका थिए । सो निर्णयबाट कोही पनि भाग्न पाउँदैन, कसैले पनि बेइमानी गर्न पाउँदैन । यति हुँदाहुँदै पनि प्रधानमन्त्री ओलीले आफ्नो उत्तराधिकार तयार पार्न खोजेका छन् । यसैका लागि उपाध्यक्ष बामदेव गौतमलाई प्रधानमन्त्री बन्ने राजमार्ग खन्ने कुरा गरेका हुन् भनेर कसैले बुझेको छैन भने उसले बुझ्पचाएको हो । यो कुरामा कसैले छलछाम देख्छ भने उसको दृष्टिदोष हो ।

सबैलाई थाहा भएको र सबैले देखेको कुरा के हो भने नेकपाका मुख्यगरी दुई नेता केपी ओली र बामदेव गौतममा केही गरौं देशका लागि भन्ने हुटहुटी छ । विगत ०५४ सालमा बामदेवको नेतृत्वमा तत्कालीन एमालेले स्थानीय चुनावमा शानदार विजय हासिल गरेको थियो । गत चुनावमा केपी ओलीको नेतृत्वमा वाम गठवन्धनले करिब दुई तिहाई मत ल्याएको हो । आफ्नो क्षमता प्रमाणित गरिसकेका यी दुई नेताको सहकार्यले आगामी दिनमा नेपाल, नेपाली जनता र नेकपाको भविष्य अझ उज्जवल हुनेछ र देशले स्थिरता पाउने विश्वास गर्न सकिन्छ । सनराइज खबरबाट साभार ।

तपाईको प्रतिक्रिया

सम्बन्धित समाचार